Pamilya ng mag-asawang vendor na nasawi sa Balibago tragedy, hinugot sa sariling bulsa ang gastos sa pagpapalibing

Sariling gastusin at ambagan ng magkakamag-anak ang naging sandigan ng pamilya Angcao upang maipalibing sina Joey at Elsa Angcao, ang mag-asawang vendor na nasawi matapos matabunan sa pagbagsak ng isang under-construction na gusali sa Brgy. Balibago, Angeles City.

Ayon sa kanilang anak na si Jamaica Angcao, hindi nila tinanggap ang umano’y alok na ₱150,000 kapalit ng pagpirma sa isang quitclaim na iniharap umano ng isang nagpapakilalang abogado na kumakatawan sa may-ari ng proyekto.

Aniya, mas mahalaga para sa kanilang pamilya na mapanagot ang mga responsable at makamit ang hustisya para sa sinapit ng kanyang mga magulang.

Ikinuwento rin ni Jamaica na lumapit sila sa ilang tanggapan ng LGU upang humingi ng burial assistance. Gayunman, sinabi niyang kinakailangan pa umanong maghintay ng humigit-kumulang isang linggo bago maiproseso ang ayuda kaya napilitan silang humanap ng ibang paraan upang mairaos ang pagpapalibing.

Nauna nang nakatanggap ang pamilya ng tulong mula sa Department of Social Welfare and Development (DSWD) at personal na tulong mula kay Pampanga Governor Lilia “Nanay” Pineda na nagkakahalaga ng ₱20,000.

Umaasa naman ang pamilya na magpapatuloy ang imbestigasyon sa insidente at mabibigyan sila ng sapat na legal na suporta sa kanilang paghahanap ng hustisya.

Noong May 31, natagpuan ang mga labi nina Joey at Elsa Angcao mula sa lugar ng trahedya. Ayon sa pamilya, nasa kanilang pwestong tindahan sa tapat ng gumuhong gusali ang mag-asawa nang mangyari ang insidente.

Patuloy namang kinukuhanan ng pahayag ng CLTV36 News ang may-ari at contractor ng proyekto. Sa naunang press briefing, sinabi ng kanilang kampo na nakahanda silang magbigay ng burial assistance sa mga biktima ng trahedya.

Para sa mga nais magbigay ng tulong pinansyal sa pamilya, narito ang GCash account ni Jamaica Angcao sa numerong 0921-250-6748. #