Pamamaril keng metung a broadcaster king Misamis Occidental, kinundena ne ning Pampanga Press Club
Kinundena ne ning Pampanga Press Club ing milyaring pamamaril kang Juan Jumalon o mas kilala antimong i DJ Johnny Walker na ning 94.7 Calamba Gold FM king Calamba, Misamis Occidental.
Milyari ing karamaldumal a krimen kabang magprograma ya i Jumalon keng kayang home studio anyang Dominggu, November 5.
Meyakit pa keng live streaming ning programa nang Jumalon ing mismung pamamaril na ning gunman kaya.
Keng Facebook post na ning Pampanga Press Club, inawad na naman ning grupu ing ustisya para kang Jumalon at ing proteksyun para kareng aliwa pang media practitioners.
Kinundena ne rin ning National Union of the Journalists of the Philippines (NUJP) ing murder nang Jumalon. Basi keng datus na ning NUJP, apin na ini ing ka-199 a kasu na ning media killing manibat anyang 1986 at kapat naman lalam na ning administrasyung Marcos, Jr..
Milyari ing pamamaril kang Jumalon atlung aldo kayari na ning International Day to End Impunity for Crimes against Journalists a merapat anyang November 2.
Samantala, sinabi na namang President Ferdinand Marcos, Jr. a e na pabusten ning kayang administrasyun ing pamanataki kareng miyembru na ning press.
Keng post ng Marcos, Jr. keng X, sinabi na nini a inutus na no reng pulis a midaun imbestigasyun bang maging mabilis ing pamamye ustisya kang Jumalon.
