Multipurpose facility para sa Aeta community at Senior Citizens, binuksan sa Pampanga at Tarlac
By Nathaniel M. Evangelista, CLTV36 News intern
Dalawang bagong pasilidad ang binuksan ng Department of Public Works and Highways (DPWH) sa Tarlac at Pampanga bilang bahagi ng pagsusulong ng inklusibong kaunlaran sa mga komunidad.
Sa Barangay Planas, Porac, Pampanga, natapos ng DPWH Pampanga 2nd District Engineering Office ang 582-square-meter multipurpose center para sa Aeta community sa barangay.
Ang pasilidad ay mayroong multipurpose hall, stage, at dressing room na magsisilbing lugar para sa mga pagtitipon, at educational and cultural activities.
May kabuuang halaga na ₱5.9-million ang paislidad na pinondohan sa ilalim ng 2024 national budget.
Samantala, sa Barangay San Vicente, San Manuel, Tarlac, pinasinayaan din ang 133.70-square-meter multipurpose building para naman sa mga senior citizen sa lugar.
Mayroon multipurpose hall, kitchen, aircon, office, at CCTV cameras ang naturang proyekto ng DPWH Tarlac 1st District Engineering Office.
Aabot naman sa ₱4.88-million ang inilaang pondo para dito na mula sa 2025 national budget. #