Makasaysayang Campo Santo sa San Fernando, may baha pa rin ilang linggo bago ang Undas

Nananatiling lubog sa baha ang bahagi ng harapang lugar ng makasaysayang San Fernando Campo Santo o Old Cemetery sa kabisera ng Pampanga ilang linggo bago ang inaasahang pagdagsa ng mga pamilyang bibisita sa puntod ng kanilang mga yumaong mahal sa buhay ngayong Undas.

Sa mga drone image na kuha ni CLTV36 News countryside reporter Paulo Gee Santos, makikita ang kalagayan ng harapang bahagi ng sementeryo habang papalapit ang tradisyonal na paggunita sa Araw ng mga Santo at Araw ng mga Kaluluwa sa Nobyembre 1 at 2.

ALAM MO BA?
Hindi lamang ordinaryong libingan ang San Fernando Campo Santo. Isa itong makasaysayang sementeryo sa Barangay San Nicolas na nagsisilbing huling hantungan ng ilang kilalang personalidad at pamilya sa kasaysayan ng Pampanga.

Kabilang sa mga nakalibing dito ang dating senador na si Sotero J. Baluyut at ilang dating alkalde ng San Fernando. Matatagpuan din dito ang mga mausoleum ng prominenteng pamilyang Lazatin at Abad Santos, na bahagi ng kasaysayang pampolitika at panlipunan ng lalawigan.

Sa nalalapit na Undas, mahalagang malaman kung may nakahandang hakbang ang lokal na pamahalaan para sa drainage, paglilinis at pag-aalis ng tubig, at iba pang paghahanda upang matiyak ang ligtas at maayos na pagdalaw ng publiko sa sementeryo.

###