31 a sagala, migparada la king Reyna De Las Flores 2024 ning Syudad Angeles

Binida yang pasibayu ing leguan da ring Angeleña king merapat a Reyna De Las Flores 2024.

31 lang sagala ibat karing miyayaliwang barangay ning Syudad Angeles ing mekyabe king piaglon anyang May 11, 2024.

Manibat king dane ning Nepo linakad la ring dalaga, linabas la king Holy Rosary Parish Church at mitipun la king entabladu king heritage district ning Syudad.

Pasantingan la naman arku ring balang barangay king aktibidad.

Mepili yang grand winner i Brittney Marie Baldwin ning Brgy. Cutcut king Reyna De Las Flores 2024.

1st runner-up ne man i Glennice Jean Turla ning Brgy. Ninoy Aquino kabang 2nd runner-up ya i Aleyna Palo ning Brgy. Pulung Cacutud.

Sinambut ne mang Best Arch ing Brgy. Anunas.

Yapin ning kadduang banua na ning Reyna De Las Flores a magnasang pasiknangan ing industriya ning fashion designing a gawang Kapampangan at ing negosyu ning sampaga king Syudad.