Ordinansa para king istriktung regulasyun kareng industrial parks at warehouses, susulung de king Pampanga
Misalang na king mumunang hearing na ning Sangguniang Panlalawigan ning Pampanga ing susubung a Ordinance Number 34 a pinasa ng 3rd District Board Member Atty. Ananias Canlas.
Ini ing batas a magnasang gawang mas istriktu deng regulasyun a mikikabalwan king operasyun da reng industrial parks ampong warehouses king probinsya.
Lalam ning mesabing proposed ordinance mibiye ing responsibilidad ning matigik a pamagbante at pamagpatupad kareng regulasyun kareng local government units (LGUs) ampo kareng law enforcement agencies kalupa na ning Philippine National Police at National Bureau of Investigation.
Kailangan mu naman kanu na magamit lamu reng ipatalakad a industrial parks ampong warehouses basi king makalage king karelang business permit.
Mealarama ya kanu ing Provincial Government king melyaring drug operation anyang September 28 nung nukarin atukal king warehouse king San Jose Malino, Mexico ding 560 kilograms ning droga a magkaulagang ₱3.8-Billion.
Aparti pa keti, mikakarakal namu rin kanu ring reklamung atatanggap ning Kapitolyu dikil kareng patalakad a heavy industry establishments ampong smelting plants.
Kayabe kareng laman ning ordinansa ing pamidaun regular at surprised inspections kareng mesabing establisyimentu ampong warehouse lakwas king San Simon ampong Mexico areas.
