Mga programa ng RBC Media Group, nominado sa 20th UP ComBroadSoc Gandingan Awards

Mula sa mahigit 200 nominees na dumaan sa masusing selection process, ilang programa at personalidad ng Radioworld Broadcasting Corporation (RBC) Media Group ang napabilang sa mga nominado sa prestihiyosong 20th UP ComBroadSoc Gandingan Awards ng University of the Philippines Los Baños (UPLB).

Kabilang sa mga nominado si Sonia Soto bilang Best TV Program Host para sa programang So To Speak ng CLTV36.

Nominee rin ang naturang programa bilang Most Development-Oriented Talk/Discussion Program.

Pasok din sa nominasyon ang CLTV36 news report na pinamagatang “Kawayang Tulay sa Macabebe, Dagdag Pasakit sa mga Guro’t Mag-aaral” para sa Most Development-Oriented News Story.

At ang AgriTV Central Luzon ng Department of Agriculture Region 3 at CLTV36 para sa Most Development-Oriented Livelihood Program.

Samantala, nakakuha rin ng nominasyon ang RW 95.1 FM bilang Most Development-Oriented FM Station.

Para sa radio categories, kabilang si Cecile Yumul bilang Best FM Radio Program Host para sa programang B.U.K.A.S. Bayan; pati na ang naturang programa bilang Most Development-Oriented Environment Program; at ang Save the Trees, Save Our Children ng naturang istasyon para sa Most Development-Oriented Radio Plug.

Ang UP ComBroadSoc Gandingan Awards ay isa sa mga highly anticipated student organization-led university-based media recognition program sa bansa na nagsimula pa noong 2007.

Sumentro sa temang “Pakinggan, Tinig ng Kalikasan” ang mga pagkilala para sa taong ito.

Gaganapin ang awards night ng 20th UP ComBroadSoc Gandingan Awards sa darating na April 25, 2026 sa DL Umali Hall ng UPLB. #