CIAC at FTI, lumagda ng kasunduan para sa Clark National Food Hub
Pinirmahan na ngayong Lunes, October 27, ang kasunduan sa pagitan ng Clark International Airport Corporation (CIAC) at Food Terminal Inc. (FTI) para sa development ng Clark National Food Hub.
Ang nasabing hakbang ay bahagi ng CIAC Flagship Projects na layong gawing Clark Aviation Capital ang kasalukuyang aviation complex.
Batay sa disenyo, ang itatayong mega food hub ay mayroong modern food storage warehouses, cold storage units, processing facilities at administrative offices. Maghahandog din umano ito ng services gaya ng research and quality control, international shipping, marketing at trading para sa domestic at export markets.
Ayon kay Joseph Alcazar, President and CEO ng CIAC, pakikinabangan ang nasabing wholesale food hub ng mga agri and food-trader sa Clark Freeport Zone, New Clark City, Metro Manila at maging sa Northern and Southern Luzon.
Pangunahing layunin umano ng proyekto na tiyakin ang food security sa bansa at palakasin ang kakayahan ng Pilipinas bilang food exporter sa pandaigdigang merkado.
Samantala, kabilang sa mga dumalo sa ceremonial signing sina Agriculture Secretary Francisco Tiu Laurel, Bases Conversion and Development Authority Chairman Hilario Paredes, BCDA President Joshua Bingcang, Directors Glenn Albano and Victor Manuel, FTI President and CEO Joseph Rudolph C. Lo, Transportation Assistant Secretary Donald Mendoza, at mga kinatawan mula sa Clark National Food Hub Task Force at New Business Ventures Unit. #