Panitikan at wika bilang yaman ng kultura, binigyang-diin sa ICLE 2025
Nasa mahigit 170 attendees mula sa iba’t ibang State Universities and Colleges (SUCs) at Senior High Schools sa bansa ang lumahok sa International Conference on Literature Education (ICLE) na ginanap sa R&E Amphitheatre ng Central Luzon State University (CLSU) nitong April 28-30.
Kabilang sa mga dumalo ang mga estudyante, guro, policy makers, community advocates, at mga mananaliksik na nagtipon upang talakayin ang papel ng panitikan at wika sa pagpapaunlad ng edukasyon at kultura. Pinangunahan ito ng CLSU sa pakikipagtulungan sa Literature Educators Association of the Philippines, Inc. (LEAP).
Sa temang “Investing in Literature and Language Education as Cultural Capital,” layunin ng pagtitipon na palalimin ang pag-unawa sa kahalagahan ng education literacy bilang yaman ng kultura at instrumento ng pagbabago sa lipunan.
Kasama sa mga naging aktibidad ng ICLE ang plenary talks, panel discussions, onsite and online paper presentation, at mga workshop.
Tampok sa 3-day conference ang mga kilalang tagapagsalita mula sa iba’t ibang institusyon sa Pilipinas at sa ibang bansa, gaya nina Dr. Jazmin B. Llana (De La Salle University), Dr. Aneeta Sundararaj (Penguin Random House Southeast Asia), Dr. Ruth A. Alido (Philippine Normal University), Dr. Ma. Rhodora G. Anceta (University of the Philippines Diliman), Dr. Ravelina Velasco (CLSU), Dr. Christopher P. Monterola (Asian Institute of Management), at Dr. Linh Phung (CEO ng Eduling Speak App at Pangea Chat).
Dumalo rin si Senator Sherwin “Win” Gatchalian, Chairperson ng Senate Committee on Basic Education, Arts, and Culture, bilang isa sa mga pangunahing tagapagsalita. Ibinahagi niya ang mga programa at patakaran ng pamahalaan laban sa illiteracy, at iginiit ang kahalagahan ng basic and functional literacy bilang pundasyon ng mas mataas na antas ng edukasyon at kaunlaran.
“In the new definition of literacy, every Filipino should know how to read, write, comprehend, and compute to break the cycle of poverty and build a stronger nation through education,” ani Senator Gatchalian sa kanyang mensahe. #