Pagtugis kina Roque, Ong, at 48 iba pang sangkot sa illegal POGO operations sa Porac, ikinasa ng PNP-CIDG
Sinimulan na ng Philippine National Police – Criminal Investigation and Detection Group (PNP-CIDG) ang pagtugis sa 50 kataong sangkot sa umano’y human trafficking kaugnay ng Philippine Offshore Gaming Operator (POGO) hub sa Porac, Pampanga.
Kabilang sa mga tinutugis sina dating presidential spokesperson Harry Roque at Cassandra Ong kasunod ng warrant of arrest na inilabas ng Angeles City Regional Trial Court Branch nitong May 8. Ang kaso ay non-bailable at saklaw ng Anti-Trafficking in Persons Act of 2003.
Ayon kay PNP Public Information Office Chief Police Col. Randulf Tuaño, bumuo na ng tracker teams ang pambansang kapulisan sa buong Pilipinas para sa paghahanap at pag-aresto sa mga akusado.
Nakikipag-coordinate na rin daw ang CIDG sa Bureau of Immigration para matukoy ang lokasyon ni Ong. Lumabas siya ng bansa matapos palayain mula sa Correctional Institution for Women kasunod ng imbestigasyon ng Kamara tungkol sa illegal POGO operations noong Disyembre 2024.
Nakikipagtulungan din ang ahensya sa International Criminal Police organization (Interpol) upang maaresto si Roque, na kasalukuyang humihiling ng asylum sa The Netherlands.
Una nang itinanggi ni Roque ang mga paratang at iginiit na biktima lamang siya ng political persecution ni Pangulong Ferdinand Marcos, Jr.. #