Mga solusyon sa gitna ng learning crisis, itinutulak ng ASSERT para sa mga guro at edukasyon
By Sonia P. Soto
CITY OF SAN FERNANDO, Pampanga — Sa gitna ng lumalalim na learning crisis sa bansa, naniniwala ang Action and Solidarity for the Empowerment of Teachers (ASSERT) Central Luzon na hindi sapat ang sisi at paghahanap ng may kasalanan. Kailangan, anila, ng seryosong pagtingin sa mga solusyong magpapalakas sa mga guro at sa mismong sistema ng edukasyon.
Sa panayam sa So To Speak ng CLTV36, tinalakay ni ASSERT Central Luzon President Arlene James Pagaduan ang tinatawag na “teacher factor” sa edukasyon—mula sa teacher mismatch hanggang sa matinding paperwork at kakulangan ng suporta sa mga guro.
Ayon sa datos ng EDCOM 2, 62% ng high school teachers sa bansa ang nagtuturo ng subject na hindi nila major.
Ngunit para kay Pagaduan, hindi sapat na tingnan ito bilang simpleng kakulangan ng competence.
“Hindi po ito kasalanan ng guro. Resulta ito ng deployment gaps at kakulangan sa strategic hiring,” paliwanag niya.
Mas maayos na matching ng teachers at subjects
Isa sa mga pangunahing solusyong nakikita ng ASSERT ay ang mas maayos na inventory at deployment system para matiyak na ang mga guro ay nagtuturo ng asignaturang kanilang pinagdalubhasaan.
Ayon kay Pagaduan, kailangang malaman ng DepEd at teacher education institutions kung aling specializations ang kulang at doon ituon ang hiring at scholarship programs.
Naniniwala rin siyang mahalagang mapalakas ang coordination ng teacher education schools at ng DepEd upang maiwasan ang mismatch sa future hiring.
Pagbawas sa paperwork para makapagtuon sa pagtuturo
Bukod sa teacher mismatch, isa ring malaking usapin ang dami ng reportorial requirements na ipinapasa sa mga guro.
Ayon kay Pagaduan, maraming teachers ang nauubusan ng oras para sa lesson preparation dahil sa sunod-sunod na reports at compliance tasks.
“May biro nga kami sa teachers: parang ipinapagawa na sa amin ang lahat, maliban sa pagtuturo,” aniya.
Bilang solusyon, isinusulong ng ASSERT ang review ng reporting culture sa DepEd at mas malinaw na delineation ng trabaho ng teaching at administrative personnel.
Layunin umano nitong maibalik sa guro ang kanilang pangunahing tungkulin—ang magturo.
Professional development, hindi lang reklamo
Sa kabila ng kanilang paninindigan para sa teachers’ welfare, iginiit ni Pagaduan na mahalaga rin ang accountability at continuous improvement ng mga guro.
Ayon sa kanya, may mga internal mentoring, peer coaching, at capability-building activities ding isinusulong ang ASSERT para tulungan ang mga gurong nangangailangan ng dagdag na support at training.
“Hindi po dapat iwan ang mahina. Dapat tinutulungan,” saad niya.
Balak din umano ng unyon na magkaroon ng training programs na maaaring ma-credit bilang Continuing Professional Development (CPD) units para sa renewal ng teaching licenses.
Pagprotekta sa standards ng pagkatuto
Sa usapin naman ng mass promotion, sinabi ng ASSERT na hindi dapat gawing automatic ang pagpasa ng mga estudyante kung hindi pa handa ang mga ito sa susunod na antas.
Para kay Pagaduan, mahalagang balansehin ang compassion at academic standards.
“Kapag ang pagpasa ay hindi nakabatay sa tunay na learning kundi sa completion rates at compliance targets, delayed injustice iyon para sa bata,” paliwanag niya.
Teachers’ welfare at excellence, hindi magkalaban
Iginiit din ng ASSERT na hindi dapat tingnan bilang magkalaban ang teachers’ welfare at teaching excellence.
Ayon kay Pagaduan, mas nagiging epektibo ang pagtuturo kapag may sapat na suporta, dignidad, at working conditions ang mga guro.
“Ang gurong may sapat na suporta ay mas may kakayahang magturo nang mahusay,” aniya.
Sa gitna ng patuloy na hamon sa edukasyon, naniniwala ang ASSERT na ang tunay na reporma ay hindi lamang tungkol sa pagtaas ng standards, kundi sa pagbuo ng sistemang nagbibigay ng sapat na suporta sa mga guro upang magampanan nila nang maayos ang kanilang mahalagang papel sa paghubog ng kabataan.
###