Maxim, nagsalita na ukol sa motorcycle hailing ban ordinance sa ilang lugar sa Pampanga
By Reyniela Tugay, CLTV36 News
Matapos umani ng iba’t ibang opinyon ang panukalang ordinansa ng Mabalacat City at Angeles City na naglalayong ipagbawal ang operasyon ng mga hindi lisensyadong motorcycle-hailing at passenger transport services sa lungsod, naglabas ng opisyal na pahayag ang Maxim Rides & Food Delivery Management.
Sa official statement na inilabas ng kumpanya, nabanggit na matagal na silang nakikipag-ugnayan sa mga lokal na pamahalaan upang suportahan ang kabuhayan ng mga Pilipinong umaasa sa ride-hailing at delivery services para sa kanilang araw-araw na kita.
Bwelta rin ng kumpanya, na kapag tuluyang naipasa ang ordinansa, may posibilidad na bumalik o dumami ang mga tunay na colorum o ilegal na motorcycle transport. At dahil wala ang mga ito sa ilalim ng regulasyon, maaaring wala silang sapat na safety standards, insurance, at pananagutan na maaaring maglagay sa panganib sa mga pasahero at driver.
Samantala, nitong Martes, February 17, mariing kinondena ni Taj Angeles, Government Affairs Manager ng Maxim, sa News@Hues media forum ng Pampanga Press Club ang pagtawag sa kanila bilang colorum. Aniya, ang kanilang isinasagawang operasyon ay alinsunod MC Taxi Pilot Study, may kaukulang lokal na permit, at may insurance at mga safety measure para sa kapakanan ng parehong pasahero at driver.
“Mayroon po kaming mga permits from LTFRB para po sa MC Taxi na operations. Ang tawag po doon at MC Taxi Pilot Study. So base po dito, pilot study lang po ang tawag sa kanya, pero ‘pag titingnan po natin yung regulations dito, nadoon na po lahat ng rules, nandoon po yung ensurance, passenger safety, andoon po yung mga requirements for the drivers, at guidelines po para sa operations. And lahat po kami sa space po ng motorcycle taxi ay sumusunod po doon sa mga patakaran na nakasaad po sa MC Taxi Pilot Study,” ani Angeles.
Gayunman, iginiit ng Maxim na iginagalang umano nila ang kapangyarihan ng lokal na pamahalaan at susunod sa anumang ordinansang pormal na ipatutupad ng bawat lungsod. #