Kabalen na si Irish Calaguas, itinalagang Assistant Secretary for Right of Way ng DOTr 

Itinalaga bilang bagong Assistant Secretary for Right of Way (ROW) Acquisition for Rail and Road ng Department of Transportation (DOTr) ang kabalen na si Irish Calaguas mula Angeles City.

Ginanap ang kanyang oath taking nitong Lunes, April 14, sa harap mismo ng kapwa niya Kapampangan na si DOTr Secretary Vince Dizon.

Si Calaguas ay may malawak na karanasan sa administrative leadership. Nagsilbi siya bilang Vice President for Operations ng Clark International Airport Corp., at dating Chief of Staff at Deputy Director General sa Philippine Drug Enforcement Agency (PDEA) mula 2017 hanggang 2020.

May hawak siyang mga degree sa Mass Communication, Business Administration, at Education, kabilang ang Doctor of Business Administration mula sa Geneva Business School. Nakapagtapos din siya ng executive education programs sa University of Oxford at Harvard Kennedy School.

Ang pagkakatalaga kay Calaguas ay kasunod ng paglagda ni Pangulong Ferdinand Marcos, Jr. sa Administrative Order No. 19 noong April 2024 na nagmamandato sa pagbuo ng ROW Committee upang mapabilis at mapabuti ang proseso ng land acquisition para sa implementasyon ng iba’t ibang railway projects. #