‘Hope Behind Bars’ project, pag-asa at kabuhayan ang hatid sa mga babaeng PDL sa CSFP

Isang programang nagbibigay pag-asa sa likod ng rehas ang “Hope Behind Bars” project na inilunsad ng Soroptimist International Pampanga para sa mga babaeng Persons Deprived of Liberty (PDL) sa pasilidad ng Bureau of Jail Management and Penology (BJMP) sa City of San Fernando, Pampanga.

Sa gitna ng kakulangan sa pagkain at mga pangunahing pangangailangan tulad ng hygiene support, binuo ang programa upang maibalik ang dignidad ng mga PDL sa pamamagitan ng kabuhayan at kasanayan.

Sa pakikipagtulungan ng Department of Agriculture Region 3, inilunsad ang “Garden of Hope,” isang urban farming at hydroponics initiative na naglalayong magturo ng makabagong paraan ng pagsasaka sa loob ng pasilidad.

Sumailalim ang mga benepisyaryo sa hands-on training at binigyan ng farm inputs gaya ng binhi, kagamitan, greenhouse, at technical support upang mapalakas ang kanilang kakayahan sa agrikultura. Sa isinagawang geo-testing, natuklasan ng mga inhinyero na hindi ligtas inumin ang kasalukuyang supply ng tubig sa pasilidad.

Bilang tugon, isinulong ang “Well of Hope” project na magbibigay ng malinis at ligtas na tubig para sa mga PDL at jail officers. Naging katuwang sa proyektong ito ang City of San Fernando Water District na sumuporta sa pondong kailangan para sa drilling materials.

Bahagi rin ng mas malawak na plano ang pagtatatag ng aquaponics system at “Bread of Hope” project, katuwang ang Department of Science and Technology at Bureau of Fisheries and Aquatic Resources. Layunin nitong mabigyan ang mga PDL ng sapat na kasanayan at oportunidad sa kabuhayan sa kanilang muling pagbabalik sa komunidad.

Patuloy namang palalawakin ang suporta sa pamamagitan ng pakikipag-ugnayan sa iba’t ibang ahensya, kabilang ang Department of Trade and Industry, Technical Education and Skills Development Authority, at Department of Labor and Employment para sa marketing, livelihood, at skills development.

Sa kabuuan, layunin ng “Hope Behind Bars” na magsilbing modelo ng pagbibigay-lakas sa mga nasa laylayan ng lipunan—pinatutunayan na sa pamamagitan ng kaalaman, kooperasyon, at malasakit, may pag-asang mabuo ang panibagong simula kahit sa likod ng mga rehas. #