Dating Supreme Court Spokesperson Hosaka, itinalagang executive director ng ICI
Itinalaga ni Pangulong Ferdinand Marcos, Jr. si dating Supreme Court Spokesperson Brian Keith Hosaka bilang executive director ng bagong tatag na Independent Commission for Infrastructure (ICI).
Makakasama niya sa Komisyon sina retired Supreme Court Associate Justice Andres Reyes, Jr. bilang head; dating Department of Public Works and Highways (DPWH) Secretary Rogelio Singson at SGV & Co. Executive Rossana Fajardo bilang mga member; at si Baguio City Mayor Benjamin Magalong bilang special adviser.
Binuo ang ICI sa bisa ng Executive Order 94 na nilagdaan ng Pangulo nitong September 11. Mandato nitong magsagawa ng fact-finding investigation laban sa korapsyon at iregularidad sa mga infrastructure project ng gobyerno, partikular ghsa flood control.
Bago ito, nagsilbi muna si Hosaka bilang assistant court administrator at hepe ng Public Information Office ng Korte Suprema. Nagsilbi rin siya bilang commissioner ng Governance Commission for GOCCs noong 2023.
Bilang executive director o undersecretary, si Hosaka ang mamumuno sa ICI Secretariat na magbibigay ng administrative at technical support sa mga operasyon ng independent commission. #