Batas para sa mas malawak na access sa alternative tertiary education, pirmado na ni PBBM
Pwede nang magkaroon ng college degree ang mga Pilipino nang hindi sumasailalim sa tradisyunal na classroom study, partikular na ang mga manggagawa.
Ito ay matapos pirmahan ni Pangulong Ferdinand Marcos Jr. ang Republic Act 12124 o ang Expanded Tertiary Education Equivalency and Accreditation Program (ETEEAP).
Sa ilalim ng naturang batas, maaaring kilalanin bilang bahagi ng isang undergraduate o special graduate program ang mga natutunang kasanayan at kaalaman mula sa formal, non-formal, o informal learning system, pati na rin ang work-related experiences.
Isinusulong din nito ang paggamit ng flexible learning modalities upang mabigyan ng mas maraming paraan ang adult learners, professional workers, at iba pang hindi makakadalo sa regular na klase.
Maaaring mag-apply sa ETEEAP ang mga Pilipinong nasa loob o labas ng bansa, nasa 23 taong gulang pataas, nakatapos ng high school sa pamamagitan ng diploma o alternatibong pagsusulit gaya ng Philippine Educational Placement Test (PEPT) at Alternative Learning System (ALS), at may hindi bababa sa limang taong karanasan sa trabaho na may kaugnayan sa kursong nais kunin.
Ang Commission on Higher Education (CHED) ang mamamahala sa pagpapatupad ng batas at magpapahintulot sa mga Higher Education Institutions (HEIs) na tumanggap ng mga aplikante para sa ETEEAP.
Bubuo rin ang CHED ng pamantayan sa pag-assess ng kakayahan, kaalaman, at karanasan ng mga aplikante, magtatakda ng mga bayarin para sa accreditation, at sisiguraduhin ang maayos na pagpapatupad ng programa sa pamamagitan ng Office of Programs and Standards Development (OPSD).
Sa pamamagitan umano ng ETEEAP, mas maraming Pilipino ang magkakaroon ng pagkakataong makapagtapos ng kolehiyo at mapaunlad ang kanilang mga karera nang hindi kinakailangang dumaan sa tradisyunal na sistema ng edukasyon.
