Barangay officials sa AC, hinimok ni Mayor Lazatin na maging aktibo sa pagbabantay sa nasasakupan
By Ashley Punzalan, CLTV36 News
Maging proactive sa pagbabantay sa inyong mga nasasakupan.
Ito ang paalala ni Mayor Carmelo “Jon” Lazatin II sa mga barangay captain sa Angeles City.
Ito’y matapos ireklamo ng ilang residente sa CLTV36 News ang iligal na pagtatapon ng basura sa gilid ng flyover sa Barangay Cutcut.
Agad namang inaksyunan ng lokal na pamahalaan ang reklamo at ipinalinis ang nakatambak na basura sa gilid ng kalsada.
Inatasan na rin ni Lazatin ang Environmental Management System ng Syudad na imbestigahan ang nasabing insidente.
Tiniyak din ng pamahalaang lungsod na patuloy nitong mahigpit na ipatutupad ang mga batas laban sa pagtatapon ng basura sa hindi tamang lugar. #