Adviser nang ex-President Duterte, payawus de keng House probe dikil keng ₱3-B drug bust king Mexico

Pakumbira re keng House of Representatives ing economic adviser nang dating Presidenti Rodrigo Duterte a i Michael Yang pauli ning kayang posibling pangasangkut keng kalakalan na ning iligal a droga.

Agpang keng Chairperson na ning House Committee on Illegal Drug Trade a i Rep. Robert ‘Ace’ Barbers, metung ya kareng incorporator na ning kumpanyang Empire 999 ing interpreter nang Yang a i Lincoln Ong.

Ngana pang Barbers, ing Empire 999 ing mikibandi keng warehouse keng Mexico, Pampanga nung nukarin da atukal deng otoridad ing 560 kilos na ning shabu a mikialagang ₱3.6-billion anyang September 2023.

E na kanu makapagmulala ing pangasangkut nang Yang keng iligal a droga agpang kang Barbers uling mismung ing Philippine National Police na ing sinabi anyang panawun ning milabas a administrasyun a metung ya ini kareng babanten dang bubuntuk keng illegal drug trade.

Atatandanang sangkut ya naman i Yang keng Pharmally controversy.

Kasagsagan na ning COVID-19 pandemic anyang peboran ne ning Procurement Service of the Department of Budget and Management ing Pharmally bang mag-provide medical supplies kapamilatan na ning multi-billion peso contract.

At uling ala yang puhunan ing kumpanya, metukal kanu keng imbestigasyun a i Michael Yang mu naman ing meg-finance keng pamanyaling medical supplies abroad.

Agpang kang Barbers, e ya mu simpling drug smuggling ing nasa ra nang pakibalwan keng Senate investigation nune pati ing pisasabian keng national security.

Darakal la kasi kanu reng Chinese incorporators kareng miyaliwang kumpanya a magpanggap Pilipinu ngana ning Senador.