‘Serenata: A Musical Concert’, marapat ya king Clark king May 31
Makasaddia yang marapat ing ‘Serenata: A Musical Concert’ keng Clark Parade Grounds king May 31.
Parti ne pa mu rin ini ning Pamana At Kultura: Clark Heritage Month Celebration ngening Mayu a inorganisa na ning Clark Development Corporation (CDC).
Kayabe kareng mag-perform keng Serenata ing Sasmuan Band 31, San Antonio Band 33, at ing Jocson College Dance Troupe.
Ala yang bayad ing piyalben ayni a marapat pasadu 5 PM king Biyernis anya agkatan no ning CDC deng kekatamung kabalen a tumagun at makisaya.
Aparti pa keni, malyari kayu namang magbisita keng Clark Museum bang akit ing Hirayang Filipino: An Exhibition on Gawad sa Manlilikha ng Bayan at Orden ng Pambansang Alagad ng Sining a makabuklat mu naman anggang May 31.
Banwang 2003 anyang pirman neng dating presidenti at ngening Pampanga Second District Representative Gloria Macapagal-Arroyo ing Proclamation No. 439 a magdeklara keng bulan na ning Mayu antimong National Heritage Month.
Miki-tema yang “Championing Heritage: Capacity Building to Transform Communities” ing pamagmasusi kanini ngening 2024.
