Manyaman Festival 2023, marapat ya king December 4-6 antimong parti na ning Pampanga Day celebrations
Ala nang mas masanting pang paralan keng pamagumpisa na ning selebrasyun para king Pampanga Day nune mipatindayag ya ing kekatamung gelingan pangaras king pamangan.
Nanu pa ta’t ing Labuad Kapampangan ing Culinary Capital na ning Pilipinas. Pauli na nini, marapat ya ing grand opening ceremony na ning masaya at makakabsing Manyaman Festival king Capitol Grounds, Syudad San Fernando keng December 4, agpang kang Festival Chairperson Mylyn Pineda-Cayabyab.
Atin mu namang Festival Cook-off a marapat king Kapitolyu king December 5 nung nukarin ali mu reng kilalang Kapampangan chef nune pati reng estudyanti ring makyabe keni bang makapaglutung iconic Kapampangan recipes.
Paralan ya kanu ini bankanita midinan lang interes deng kayanakan king kulturang Kapampangan.
Makiligligan la reng anak king Best Arobu, Best Kapampangan Heirloom Dishes, at Best Kapampangan Dishes.
Atin mu ring exhibition da reng chefs king Benigno Hall bandang ala-una ning gatpanapun ning mesabing petsa.
Agpang kang Randy Del Rosario, Tourism Head, maging istriktu la kareng Kapampangan iconic dishes a ilutu da reng participants.
Samantala, mamuklat ya naman ing Manyaman Food Expo king The Event Center na ning SM City Pampanga manibat December 4 anggang December 6.
