Barangay at SK officials, makasawup la king laban kontra Violence against Women and Children: WIMP
Amuyutan no ning Women in Pampanga Media (WIPM) deng bayu at reelected Barangay at Sangguniang Kabataan officials a sumawup bang mituknang ing Violence against Women and Children (VAWC) at protektan la king dagdag kapanasakitan.
Pepasyag ne ning WIMP, metung a grupu da reng babaying journalists, influencers, at aliwa pang media practitioners keti labuad Kapampangan, ing karelang suporta king 18-Day Campaign to End Violence Against Women a mayari king December 12.
Basi king RA 9262 o ing Anti-Violence Against Women (VAW) and their Children Act of 2004, mangapalyari ya ing VAW nung panasakitan ne ning metung a tawu ing kayang babaying asawa, dating asawa, o ninumang babayi a mikirelasyun ya o nung mikianak la. Kayabe kareng paralan na ning pamanabusu ing physical, sexual, psychological harm o suffering at economic abuse.
King akalap a data na ning WIPM ibat king Pampanga Provincial Police, mamabut king 473 VAWC cases ing milyari magumpisa January 1 anggang November 15, 2023. Mas mababa ya ini king 576 cases a mitala anyang 2022.
Kareng datus ngening banwa, kayabe keni ing rape, acts of lasciviousness, anti-photo and video voyeurism, anti-trafficking in persons, anti-VAWC, attempted ATIP, grave threats, concubinage, physical injuries, sexual harrassment, unjust vexation, anti-child abuse, at Safe Spaces Act.
Agpang king pulisya, 352 cases reng me-file king korti, 104 deng under preliminary investigation kabang 17 deng me-dismiss. 176 kareng suspects deng kamag-anak da reng biktima kabang 297 deng siping bale o e da kilala.
Kaugne nini, sinabi nang Sonia P. Soto a convenor ning WIPM at presidenti ning CLTV36 a dapat neng mituknang ing gender-based violence kareng komunidad.
Makayakma ne man ing pasyag nang PPO Director PCol. Levi Hope Basilio a manwalang mas maging yang epektibu ing preventive approach kareng pang family at community level.
Makanta man, papakit da naman deng bilang da reng reported VAW incidents at filed cases a mas maging empowered la reng biktima.
Agpang kang Basilio, atiu king alus 54% ing crime solution efficiency da reng pulisya.
