Maigit 500 a katawu, mekinabang la king medical mission da ring NGOs at Subic LGU
Miyabe-abe la ring mapilan a Non-Governmental Organizations, government agencies at ing lokal a kapanibalan ning Subic bang mamye serbisyung medikal karing memalen king Subic Sports Complex anyang May 11.
Penimunan ne ning Western Luzon II Lakan Maharlikans Eagles Club kayabe ning munisipyu ning Subic, Zambales, Confederation of Community Oriented Policing System Non-Government Organizations (CCOPS-NGOs), Philippine Drug Enforcement Agency Zambales Provincial Office, Rosario Eye Center, Manila Times School of Medicine at Harley Davidson Manila Chapter ing merapat a Medical Mission.
Miras lang 400 a katau ing mekinabang king Operation Tuli nung nukarin apin kanu ing mumunang dili a merapat king balen kayari ning pandemya.
Atsu naman king 100 a pasyente ing mebenepisyuhan king libring konsultasyun king mata at 12 kareni ing misalang king operasyun.
Midinan la naman panulu ampong bitamina ring egana-ganang pekonsulta king Medical Mission kaybat dang me-diagnose karing volunteer doctors.
Anang Jigger Juniller, Governor ning Lakan Maharlikans Eagles Club, matagumpe ya ing inampang dang saup kapaldanan uli ning pamisaupan da ring miyaliwang sektor a magmalasakit karing mangailangan.
King lagyu da naman ding memalen Subic, pesalamat ya i Mayor Jon Khonghun king proyektu uling dakal karing kayang kabalen ing mekinabang at meulu.
